आजियटा समूहलाई अनूमति बिना एनसेलको शेयर बिक्री नगर्न दूरसञ्चार प्राधिकरणले पत्र पठाएकै दिन एनसेलले ८० प्रतिशत शेयर बेचेको पाइएको छ ।
मंसिर १३ गते मलेसियाको आजियटा कम्पनीले एनसेलको ८० प्रतिशत शेयर बिक्री गरेर नेपालबाट बाहिरिने निर्णय सार्वजनिक गरेको थियो । आजियटाको घोषणापछि शुक्रबार मात्र दूरसञ्चार प्राधिकरणले उसलाई अनुमति लिएर मात्रै कारोबार गर्न पत्र काटेको थियो ।
तर, आजियाटा समूहले बेलायतको स्पेक्ट्रलाइट कम्पनीलाई एनसेलको ८० प्रतिशत शेयर बेचेको छ । स्पेक्ट्रलाइटले एनसेलको ८० प्रतिशत खरिद गरेको घोषणा गर्न पाउनु खुसीको कुरा भएको बताएको छ ।
स्पेक्ट्रलाइटसँग एनसेलको २० प्रतिशत शेयर यसअघि नै रहेको थियो । योसँगै एनसेलको स्वामित्व स्पेक्ट्रलाइटमा हुने भएको छ ।
आजियटा भने विभिन्न कर विवादका बीच नेपालबाट कानूनी घेराभन्दा बाहिर गएर बाहिरिन खोजेको छ । उसले नेपालको दूरसञ्चार नियमावलीलाई वेवास्ता गर्दै आफ्नो शेयर बिक्रीको घोषणा गरेको हो ।
